ບັນຫາເລື່ອງສຸຂະພາບທີ່ດີບົນພື້ນຖານຂອງຄວາມສະອາດ ຖືວ່າເປັນເລື່ອງທີ່ສໍາຄັນ ແລະ ບໍ່ຄວນເບິ່ງຂ້າມ ເນື່ອງຈາກການມີສຸຂະພາບທີ່ດີ ກໍຍ່ອມເກີດມາຈາກການມີສິ່ງແວດລ້ອມທີ່ດີ, ເຊັ່ນດຽວກັນກັບບັນດາໝູ່ບ້ານ 15 ບ້ານ ທີ່ຢູ່ໃນເຂດສຸກສາລາກິແນະ ເມືອງສະໝ້ວຍ ແຂວງສາລະວັນ ກໍເປັນອີກກຸ່ມບ້ານໜຶ່ງ ທີ່ຍັງມີຄວາມສ່ຽງທາງດ້ານການຮັກສາສຸຂະພາບ ເພາະວ່າເຂົາເຈົ້າບໍ່ມີວິດຖ່າຍ ແລະ ມີການຖ່າຍຊະຊາຍຕາມປ່າ ອັນເປັນສາເຫດຂອງການເກີດແມ່ພະຍາດຕ່າງໆ, ເນື່ອງຈາກພວກເຂົາເຈົ້າຍັງບໍ່ມີຄວາມຮູ້ ແລະ ຄວາມເຂົ້າໃຈຢ່າງພຽງພໍໃນການຮັກສາສຸຂະພາບຂອງຕົນເອງແລະຄອບຄົວ, ເຊິ່ງມັນສະແດງອອກຢູ່ທີ່ ເດັກນ້ອຍໃນເຂດເປົ້າໝາຍແມ່ນມີອາການຖອກທ້ອງຢູ່ເປັນປະຈໍາ ແລະ ຮ່າງກາຍບໍ່ແຂງແຮງສົມບູນ ເວົ້າລວມກໍຄືປະຊາຊົນພາຍໃນບ້ານ ເວົ້າສະເພາະກໍແມ່ນບັນເດັກນ້ອຍ, ດັ່ງນັ້ນ ທາງໂຄງການ “ການຮ່ວມມືເພື່ອການປັບປຸງວຽກງານໂພຊະນາການຂອງຊຸມຊົນຊົນເຜົ່າກາໂດທີ່ມີຄວາມສ່ຽທາງດ້ານການຂາດສານອາຫານໃນເຂດສຸກສາລາກິແນະ, ເມືອງສະຫມ່ວຍ, ແຂວງສາລະວັນ.” ຈຶ່ງໄດ້ເຫັນເຖິງຄວາມສໍາຄັນຂອງບັນຫາດັ່ງກ່າວ ຈຶ່ງໄດ້ຮ່ວມມືກັບພາກສ່ວນສາທາລະນະສຸກເມືອງສະໝ້ວຍ ແລະ ສຸກສາລາກິແນະ ພ້ອມດ້ວຍອໍານາດການປົກຄອງບ້ານ ປັບປ່ຽນແນວຄວາມຄິດແກ່ປະຊາຊົນໃຫ້ເຫັນເຖິງການດູແລເອົາໃຈໃສ່ຮັກສາສຸຂະພາບ ແລະ ຮັກສາຄວາມສະອາດ ເພື່ອຊີວິດການເປັນຢູ່ທີ່ດີຂຶ້ນຂອງເຂົາເຈົ້າເອງ ແລະ ຄອບຄົວ
