ຄວາມສະເໝີພາບດ້ານບົດບາດຍິງ-ຊາຍ ແລະ ການແບ່ງວຽກໃນຄົວເຮືອນລະຫວ່າງຍິງ-ຊາຍ ໃນຊຸມຊົນແຕ່ເດີມແມ່ນໃຊ້ເພດເປັນຕົວກຳນົດ ແລະ ໄດ້ສືບທອດຕໍ່ໆກັນມາຈົນກາຍເປັນວັດທະນາທຳໃນການດຳລົງຊີວິດໃນຊຸມຊົນ ຜູ້ຍິງຈະໄດ້ຮັບມອບໝາຍໃຫ້ເບິ່ງແຍງຄວາມເປັນຢູ່ໃນຄອບຄົວເປັນໜ້າທີ່ຫຼັກຕ້ອງຮັບພາລະທຸກຢ່າງ ເພື່ອອຳນວຍຄວາມສະດວກໃຫ້ແກ່ຄົນໃນຄອບຄົວ, ສ່ວນຜູ້ຊາຍມີໜ້າທີ່ຫຼັກຄືເປັນຜູ້ນຳຄອບຄົວ ແລະ ມີໜ້າທີ່ຫາລ້ຽງຄອບຄົວ. ປະຈຸບັນສະພາບສັງຄົມໄດ້ປ່ຽນແປງໄປຫຼາຍຈາກເກົ່າຕາມກະແສສະພາບເສດຖະກິດ ແລະ ວັດທະນະທຳ. ແຕ່ບົດບາດຍິງ-ຊາຍ ຍັງຄົງປ່ຽນແປງພຽງເລັກໜ້ອຍ. ແມ່ຍິງຍັງຄົງມີໂອກາດອອກນອກບ້ານໜ້ອຍກວ່າຜູ້ຊາຍ ເຖິງຢ່າງໃດກໍ່ຕາມໃນທາງປະຕິບັດຍິງ-ຊາຍ ກໍ່ໄດ້ມີການຊ່ວຍເຫຼືອເຊິ່ງກັນ ແລະ ກັນໃນການເຮັດວຽກທັງສອງຝ່າຍ. ແຕ່ອາດມີໄລຍະເວລາບາງຊ່ວງ ຫຼື ໂອກາດໃນການຊ່ວຍວຽກທີ່ແຕກຕ່າງກັນ ຜູ້ຍິງຈະຊ່ວຍວຽກໃນຄົວເຮືອນ ແລະ ນອກເຮືອນຢູ່ຕະຫຼອດເວລາທີ່ມີໂອກາດ. ສ່ວນຜູ້ຊາຍຈະຊ່ວຍວຽກຜູ້ຍິງພາຍໃນເຮືອນກໍ່ຕໍ່ເມື່ອບໍ່ໄດ້ໄປວຽກນອກ ຫຼື ບໍ່ມີວຽກເຮັດ. ສະຫຼຸບແລ້ວ ໃນປັດຈຸບັນນີ້ ບັນຫາກໍ່ຄື ຍັງມີແມ່ຍິງຈຳນວນຫຼາຍກໍ່ຍັງແບກຫາບພາລະໜັກໃນການເຮັດວຽກເຮືອນການຊານລ້ຽງດູລູກເຕົ້າ ລວມເຖິງການຫາລາຍໄດ້ເຂົ້າຄອບຄົວ ເຊິ່ງຖືວ່າການເຮັດວຽກເຮືອນການຊານຮັບໃຊ້ຄອບຄົວນັ້ນແມ່ນບໍ່ມີຄ່າຈ້າງຫຍັງບາງຄັ້ງຄາວກໍ່ຖືກຜົວເວົ້າວ່າເມຍຂ້ອຍບໍ່ໄດ້ເຮັດຫຍັງ? ແທ້ຈິງແລ້ວວຽກເຮືອນທີ່ເຂົາເຈົ້າເຮັດຮັບໃຊ້ລູກຜົວນັ້ນຖ້າຄິດໄລເປັນຄ່າຈ້າງ ແມ່ນມີຄ່າມະຫາສານແຕ່ທຸກຄົນແມ່ນບໍ່ເຫັນຄຸນຄ່ານີ້ເລີຍ.
ເມື່ອເຫັນບັນຫາດັ່ງກ່າວແລ້ວທາງໂຄງການພວກເຮົາໄດ້ນຳເອົາຄວານຮູ້ດ້ານການຮຽນຮູ້ ແລະ ປະຕິບັດຕົວຈິງດ້ານບົດບາດຍິງ-ຊາຍ (GALs)ລົງຝຶກໃຫ້ກຸ່ມເປົ້າໝາຍໂດຍການນຳໃຊ້ເຄື່ອງມື ຕົ້ນໄມ່ດຸ່ນດ່ຽງ ຈະສະແດງເຖິງສະພາບຄວາມເປັນຈິງໃນການດຳລົງຊີວິດໃນຄອບຄົວ ວຽກທີ່ແມ່ຍິງເຮັດຫຼາຍຫນ່ອຍ, ວຽກທີ່ຜູ້ຊາຍເຮັດຫຼາຍໜ້ອຍໃນຄອບຄົວຫຼັງຈາກນັ້ນຈຶ່ງມາວາງໃສ່ແຜນວາດຂອງຕົ້ນໄມ້ເພື່ອໃຫ້ເກີດການແບ່ງວຽກໃນຄົວເຮືອນທີ່ສະເໝີພາບກັນ (ເອີ້ນວ່າເປັນແຜນການແບ່ງວຽກໃນຄອບຄົວທີ່ສົມດຸນ)
ຫຼັງຈາກທີ່ເຮົາໄດ້ລົງຈັດການຝຶກອົບຮົມໃຫ້ກຸ່ມແລ້ວ ກໍ່ໄດ້ມີການຕິດຕາມປະເມີນຜົນເປັນແຕ່ລະໄລຍະ ຕາມແຜນທີ່ຄອບຄົວຄູ່ຜົວເມຍເຂົາເຈົ້າໄດ້ວາງໄວ້ຮ່ວມກັນ.ໃນບາງຄອບຄົວໄດ້ມີການຊ່ວຍວຽກກັນຫຼາຍຂື້ນ ແລະ ສິ່ງໃດທີ່ຊາຍບໍ່ມັກຍິງກໍ່ບໍ່ເຮັດ, ສິ່ງໃດທີ່ຍິງບໍ່ມັກ ຊາຍກໍ່ຫຼຸດຜ່ອນລົງ ມີການແບ່ງວຽກຊ່ວຍວຽກ ແລະ ດຳລົງຊີວິດແບບເທົ່າທຽມກັນ ບໍ່ເອົາປຽບກັນ ແລະ ກໍ່ເຫັນຄຸນຄ່າຂອງການເຮັດວຽກໜັກຂອງເມຍ ຖ້າຄິດເປັນເງິນແມ່ນຈຳນວນຫຼາຍສົມຄວນ.
